Luke 10

1Iyane da halu ho hirro hunna, ette Habu anyimu illamuk tomwana hetterik ette efahak isieja lohorik lohorik a hosiere honyie amassiok daŋ inno lawak inyeja ahuye. 2Ette hijo do hosie, “Odon mana, hati oduhuco heigamak. Kokwak itimoje no da Habu la mana, anyar lefahak hegiamak da mana.

3Ifeti hikoi nahatai. Itiwolo, efahak naŋ itai iya huloho do hiji he ewoho. 4Ibaŋa eyari innamuk arobia, kullo, hamuha, eijo itai ibe lifony lobo do hikoi.

5Da massiok inne ejiŋak itai hosiere Itijo, 6‘Hotowuana himwara da haŋ inna,’ Lowuon tihoni lo himwara de, owuon iso himwara do honyie. Ojo lobe ocohini iso da hatai. 7Itudule da haŋ nyie daha, mette hirro inne eiso isie da hatai, nyo awak haigemani idumuti innohonyie. Ibaŋa ofwo da haji ade nabo.

8Itadahi hirro inne eba do hosiere hatai da massiok inne efuye itai, 9itilibo haŋwak inno lowuon de. Ilimak do hosie hijo, ‘Eliaha Obie no Hollum da hatai.’

10Hati lefwo itai ajiŋak do nabo bore na gala, ojo isieja obe efwotu itai, ifeti ahikoi ette itai hijo, 11‘Ara ida hido tuduha nahatai eediho da hamuha innohooi, etuturok iyohooi daŋ daŋ hatai! Anyar liyen hijo, eliaha Obie no Hollum.’ 12Iya ajo naŋ da hatai hijo, da far nyie obolo iso ŋoto nahatai agalik no Sodoma da far no ŋoto.

13Orru iso da hatai Korasin! Orru iso da hatai Betasaida! Lowuon ifa hirro inno olibo da Tire ho Sidona da hatai, noyite ifa isieja beren, ette ŋahunye de siwali. 14Hati eyak iso to Tire ho Sidona da far no ŋoto, ette run da hatai. 15Itai Kapernam, egigillo iso mahu itai hijo eba iso itai te idoŋ? Obe, efwo iso itai ahima.

16Lie le letira da hatai, eitira da hanaŋ, ojo lie lebo itai, ebo naŋ, ojo lie lebo naŋ, ebo lia lefahu naŋ.”

17Ette luha tomwana hetterik harik ŋacohini ho mune ette hijo, “Habu, origoŋo meniaŋa do hooi to fure nohoi.” 18Ette Yesu hijo do hosie, “Ariŋa ida naŋ Sitan lohuyu te ido iya hilla. 19Itiwolo, eiso naŋ da hatai golon ne eriori itai munok, tosi, golon na lagalik mereni, obe iso nabo sihin eriafu itai. 20Hotobiaŋa itai limuno hijo origoŋo oyirihien da hatai, hati itimunoi binno hijo egioro fureita innahatai te ido.”

21Da far nyie, omuno ifa inyeja do Loholio lo Olibo, ette hijo, “Etihabwo iye money, Habu la fau he ido, nyo eŋofak iye hirro hunna tara ferejok, ette isia ŋalew do huwo illo obe elofere, iya iŋeyaha. Ee Monye, isiara hotowuana iya liwak iye.”

22“Eiso ifa hirro daŋ da hanaŋ tere Monye hanaŋ, obe lobo tihoni loyen Lenyi arari Monye, obe hidofe lobo tihoni oyien Monye arari Lenyi, ojo do tihoni lawak Lenyi, etuhutek iso inyeja.”

23Ette inyeja hijo do hejufak illohonyie kaikai, “Hotomune luha lowolo hirro inne lewolo itai. 24Ajo naŋ da hatai, hijo oluŋa hekilak ille lawak egonyu hirro inne egonyu itai, hati obe isieja leriamik ŋegonyu, awak hidofe hitira hirro inne etira itai, ojo isieja obe leriamik hitira.”

25Niya odioto ifa lobo lo Yudea hetiyanani le ifahita ette hikem Yesu hijo, “Hetiyanani, hehum iso naŋ nyo hio anyar arrumu wuaran no losio furŋ?” Ette 26Yesu hijo do honyie, “Hojo ifahita nyoŋ Ihiena iye isieja jaiŋ?” 27Ette inyeja hitiraŋ hijo, “To mune Hollum Habu lohoi ta taji nohoi daŋ, to Oholio nohoi daŋ, to golon nohoi daŋ, ojo te higigillo nohoi daŋ, ho Lenyihari hoi iya kwan nohoi.” 28Ette Yesu hijo do honyie, “Etiraŋak iye no lobis. Igema inne eijoo iye ette manyai.”

29Hati awak ifa hetiyanani etibisak kwan nohonyie, ette hijo do Yesu, “Ŋai lara Lenyihari hanaŋ?” 30Ette Yesu etiraŋak hijo, “Ohu ifa lobo tihoni aŋolon to Yerusalem a Yeriko. Ette inyeja ŋahuyek de hiji ho hoholak illafa esohu ŋahorru hirro innohonyie, ette hillum inyeja, ette ŋaisbusak inyeja de ikoi ahayoni.

31Ojo lobo Fadiri ohu hidofe te ikoi tenyie, hati ifa lewolo inyeja haŋwani, ette hilaŋ to nabo hikoi. 32Ette hidofe lobo hegiamani le Iklesia ŋawoŋ. Ifa egonyu inyeja, ette hilliŋ ta nabo hikoi.

33Hati ohu ifa lobo Samaritani hikoi nohonyie, ette ŋawoŋ amai nyie nafa owuanari inyeja. Ifa ewolo inyeja omehini ifa inyeja do honyie. Ette ŋehutok do honyie, ette hififit horroŋon innohonyie, epot, ette ŋejuhok hiyali ho balu do hosie. 34Ette ŋakafak inyeja ahide ho ciaŋ, ette ŋeyani inyeja a hotwai kulub, ette ŋehuhumak inyeja. 35Te hitarrihi na far nohonyie, ette ŋadumu arobiya innohonyie arik ette hiso isieja do tihoni lafa oriŋa inyeja ette hijo, ‘Yari inno teriŋai inyeja, lowuon hinnak hirro innee eiso iye do honyie, laŋacohini naŋ, attu iso naŋ ŋadumak iye.’

36Lari tihoni ara onyihari lo tihoni lohuyek do hoholak ille lohunik?” 37Ette hetiyanani hijo, “Lara omehini do honyie.“Ette Yesu hijo do honyie, “Ino igema ania.”

38Niya, ofwo ifa isieja hikoi nohosie, ette ŋajiŋak nabo doŋe ojo nabo hito noŋorwo nara fure Marta hiŋa do hosie ikat na haŋ nohonyie. 39Owuon ifa inyeja he inasi nara fure Maria nafa etole de hicuŋi no hejek inno Yesu ne etira Hiram nohonyie.

40Hati ette Marta nafa egigiama ŋawoŋ do Yesu ette hijo, “Hab, ibe hati iye ewolo innasi hanaŋ ebusak nang hehuma igem hamai, “Tojo do honyie woŋ heilwuak naŋ.” 41Hati ette Habu hitiraŋ, ojoo do honyie, “Marta, Marta, ilafuho iye hirro aria, Hati owuon sihin naboite nala galik. Anyimu Maria no olibo do honyie, nolobe iso eyari ade tere honyie.”

42